بنیامین نەتانیاهۆ، سەرۆکوەزیرانی ئیسرائیل هۆشدارییەکی توند دەداتە ویلایەتە یەکگرتووەکانی ئەمریکا لەبارەی ئەگەری فرۆشتنی فڕۆکەی جەنگیی پێشکەوتووی جۆری F-35 بە تورکیا، و ڕایدەگەیەنێت کە پڕچەککردنی ئەنقەرە بەم شێوازە، هاوسەنگیی هێز لە ناوچەی ڕۆژهەڵاتی ناوەڕاستدا تێکدەدات.
نەتانیاهۆ لە چاوپێکەوتنێکی تایبەتدا لەگەڵ کەناڵی "فۆکس نیوز"ی ئەمریکی، ڕەخنەی توندی لە سیاسەتە هەرێمییەکانی تورکیا گرت و گوتی: "تورکیا وڵاتێکە نیوەی قوبرسی داگیرکردووە و بە ئاشکراش قسە لەسەر کۆنترۆڵکردنی قودس دەکات.
من پێم وانییە ئەوان شایستەی ئەوە بن فڕۆکەی هاوچەرخی وەک F-35ـیان پێبدرێت."
سەرۆکوەزیرانی ئیسرائیل ئاماژەی بەوەش کرد کە ئەنقەرە بە ئاشکرا پشتگیری لە بزووتنەوەی حەماس دەکات و هاوکات هەڵوێستێکی ڕوون و توندیشی بەرامبەر بە ئێران نییە، بۆیە پڕچەککردنی بەم چەکە ستراتیژییانە مەترسی بۆ سەر ئاسایشی ناوچەکە هەیە.
بنیامین نەتانیاهۆ جەختی لەوە کردەوە کە پەیوەندییەکی زۆر باش و توندوتۆڵی لەگەڵ دۆناڵد ترەمپ، سەرۆکی ئەمریکادا هەیە و لەسەر زۆربەی پرسە سەرەکییەکان هاوڕا و هاوئاهەنگن، هەرچەندە ئاشکرای کرد کە هێشتا بەرواری فەرمیی سەردانەکەی بۆ ئەمریکا دیاری نەکراوە.