وەزارەتی دەرەوەی ئێران لە ڕاگەیەندراوێکدا گەمارۆ نوێیەکانی ویلایەتە یەکگرتووەکانی ئەمریکای بۆ سەر وڵاتەکەی سەرکۆنە کرد و داوای لە سەرجەم وڵاتانی جیهان کرد پابەندی بڕیارەکانی واشنتن نەبن.
وەزارەتی دەرەوەی ئێران سزاکانی ئەمریکای بە "تیرۆریزمی ئابووری" ناو برد و ڕایگەیاند کە بەتەواوی نایاسایی و ناڕەوان، هاوکات پێشێلکردنی ئاشکرای ڕێککەوتننامەی نەتەوە یەکگرتووەکان و یاسا مرۆییە نێودەوڵەتییەکانن. لە ڕاگەیەندراوەکەدا داوا لە هەموو وڵاتان کراوە کە ئەم سزایانە جێبەجێ نەکەن.
ئەم بەیاننامەیەی تاران دوای ئەوە هات کە لە چەند ڕۆژی ڕابردوودا وەزارەتی گەنجینەی ئەمریکا گەڕێکی نوێی سزا ئابوورییەکانی بۆ سەر ئێران ڕاگەیاند واشنتن داوای لە سەرجەم وڵاتان کردبوو کە سزاکان جێبەجێ بکەن و هۆشداریشی دابوو کە هەر وڵاتێک یان لایەنێک پابەند نەبێت، ڕووبەڕووی سزای دارایی توند دەبێتەوە.