پەیوەندییەکانی ئێران و ویلایەتە ئەمریکا گەیشتووەتە ئاستێکی زۆر ئاڵۆز، بەتایبەت دوای تێپەڕبوونی 10هەفتە بەسەر هێرشە سەربازییەکانی ئەمریکا و ئیسرائیل بۆ سەر دامەزراوەکانی ئێران، ئێستا هەردوولا لە ڕێگەی نێوەندگیری وەک پاکستانەوە خەریکی ئاڵوگۆڕی پێشنیازن، بەڵام پێنج خاڵی سەرەکی وەک "گرێکوێرە" لەبەردەم دیپلۆماسی ماونەتەوە کە بریتین لە:
بەرنامەی پیتاندنی یۆرانیۆم
ئەمە دێرینترین خاڵی ناکۆکییە؛ واشنتن داوا دەکات ئێران بۆ ماوەیەکی درێژخایەن پیتاندنی یۆرانیۆم ڕابگرێت بۆ ئەوەی دڵنیابێتەوە لەوەی تاران ناتوانێت چەکی ئەتۆمی بەرهەم بهێنێت.
چارەنووسی کۆگاکانی یۆرانیۆمی 60٪
ئەمریکا و ئیسرائیل سوورن لەسەر ئەوەی دەبێت کۆگاکانی یۆرانیۆمی پیتێنراوی ئاستی باڵا ڕادەست بکرێن یان بۆ دەرەوەی وڵات بگوازرێنەوە.
کۆنترۆڵی گەروی هورمز
گەروی هورمز وەک شا دەماری وزەی جیهان، خاڵێکی هەستیاری ململانێکانە. ئەمریکا داوای "ئازادیی گەشتە دەریاییەکان" و کردنەوەی بێ مەرجی ئەم ئاوڕێیە دەکات، بەڵام ئێران کۆنترۆڵکردنی گەروەکە وەک کارتێکی فشار و هێز لە دژی سزاکان و هەڕەشە سەربازییەکان بەکاردەهێنێت.
هەژموونگەرایی ئێران و "بەرەی مقاوەمە"
چالاکیی گروپە وەلائییەکان لە لوبنان، یەمەن، عێراق و سوریا یەکێکی دیکەیە لە کێشەکان.
بەرنامەی موشەکیی بالیستیک
ئێران خاوەنی گەورەترین کۆگای موشەکییە لە ناوچەکەدا و ئەمەش مەترسییەکی جدییە بۆ سەر بەرژەوەندییەکانی ئەمریکا و هاوپەیمانەکانی.
بە گشتی، ئەم پێنج خاڵە ئاڵۆزە نیشانی دەدەن کە ململانێی نێوان ئێران و ئەمریکا تەنیا لە چوارچێوەی دۆسیەی ئەتۆمیدا قەتیس نەماوە، بەڵکو گۆڕاوە بۆ کێبڕکێیەک لەسەر سەروەریی ناوچەیی و هاوسەنگیی هێز.
لە کاتێکدا جیهان چاوەڕێی ئەنجامی دانوستانەکانی نێوان تاران و واشنتن دەکات، ئاسایشی وزە و سەقامگیریی ڕۆژهەڵاتی ناوەڕاست بەستراوەتەوە بەوەی کە ئایا هەردوولا دەگەنە تێگەیشتنێکی هاوبەش یان جارێکی دیکە گڕی شەڕ و گرژییەکان ناوچەکە دەگرێتەوە.