بەرپرسێکی باڵای حکومەتی ئەمریکا ڕایگەیاند، دوای پڕۆسەیەکی پێداچوونەوەی دوو ساڵە، عێراق ڕەزامەندی نیشانداوە لەسەر کارکردن لەگەڵ ڕێکخراوی نێودەوڵەتیی فایتیف (FATF) بۆ چارەسەرکردنی "ستراتیژیترین" کەموکوڕییەکانی لە بواری ڕووبەڕووبوونەوەی سپیکردنەوەی پارە و دابینکردنی دارایی بۆ تیرۆر.
ئەو بەرپرسە ئەمریکییە ئاماژەی بەوە کردووە کە بەغدا لە ئێستاوە دەستی بە هاوێشتنی "هەنگاوی ئەرێنی" کردووە و ئیرادەیەکی سیاسیی ڕوونی نیشانداوە بۆ پابەندبوون بە پێوەرە نێودەوڵەتییەکانی فایتیف.
هاوکات واشنتن داوای لە حکوومەتی عێراق کردووە کە "ئەم وزە ئەرێنییە بپارێزێت" و بە خێرایی پلانی کاری هاوبەشی لەگەڵ ڕێکخراوەکە جێبەجێ بکات.
ئەم پەرەسەندنە لە کاتێکدایە کە لە چەند مانگی ڕابردوودا بەهۆی شەڕ و ئاڵۆزییەکانی ناوچەکە، کەرتی بانکی و دارایی عێراق لە ژێر چاودێرییەکی چڕی نێودەوڵەتیدا بووە، بەتایبەت لەبارەی حەواڵە دەرەکییەکان و خستنەڕووی دۆلار لەلایەن بانکی ناوەندییەوە.