ئێران سزای لەسێدارەدانی بە سەر هاوڵاتییەکی دیکە دا جێبەجێ کرد

دەسەڵاتی دادوەریی ئێران، جێبەجێکردنی سزای لەسێدارەدانی بە سەر کارمەندێکی پێشووی کۆمپانیایەکی تەکنەلۆژیای سەر بە دامەزراوەیەکی سەربازی دا ڕاگەیاند.

ئەمڕۆ چوارشەممە (13) ی ئایاری (2026)، سزای لەسێدارەدانی ئیحسان ئەفراشتە، پسپۆڕی بواری دیجیتاڵی و ئەندازیاری سۆفتوێر لە تاران جێبەجێ کرا. بە گوێرەی ڕاگەیەندراوی دەزگای دادوەریی ئێران، ناوبراو تۆمەتبار کراوە بە سیخوڕیکردن بۆ دەزگای مۆساد و پێدانی زانیاریی ورد و هەستیار لە سەر کارمەندان و پلەبەندیی ڕێکخراوەیی ئەو دامەزراوە سەربازییەی تێیدا کاری کردووە.

لە بارەی وردەکاریی دەستگیرکردنەکە، میدیا فەرمییەکانی ئێران ئاماژەیان بە ئەو کردووە، ناوبراو لە ساڵی (2024) و دوای گەڕانەوەی لە تورکیا، لە لایەن هێزە ئەمنییەکانەوە دەستگیر کراوە و دوای زنجیرەیەک لێکۆڵینەوە، لە لایەن دادگای شۆڕشەوە سزای لەسێدارەدانی بۆ دەرچووە.