شاندی ئیمراڵی دەم پارتی لەبارەی بڵاوبوونەوەی چەند نووسراو و کۆنووسێکی "ساختە: لە تۆڕە کۆمەڵایەتییەکاندا کە دەدرێنە پاڵ عەبدوڵا ئۆجالان، ڕاگەیەندراوێکی بڵاوکردەوە و ڕایگەیاند کە ئەو بابەتانە دەستکاری کراون و دوورن لە ڕاستییەوە.
لە ڕاگەیەندراوەکەی شاندەکەدا هاتووە کە بڵاوکردنەوەی ئەم زانیارییە ناڕاست و بێبنەمایانە، هەوڵێکی مەترسیدارە بۆ هەڵخەڵەتاندنی رای گشتی و تێکدانی ئەو پرۆسە هەستیارەی کە ئێستا لە ئارادایە.
لە کۆتاییدا، شاندی ئیمراڵی جەختی لەوە کردەوە کە پێویستە رای گشتی تەنها پشت بە ڕاگەیەندراوە فەرمییەکانی شاندەکە، خێزان و پارێزەرەکانی عەبدوڵا ئۆجالان ببەستێت، و بە هیچ شێوەیەک باوەڕ بەو بەڵگەنامە و نووسراوانە نەکات کە سەرچاوەیەکی فەرمییان نییە.