دۆناڵد ترەمپ، سەرۆکی ئەمریکا ڕایگەیاند، پەیوەندییەکی تەلەفۆنی لەگەڵ شازادە محەممەد بن سەلمان، شازادەی جێنشینی سعودیە، ئەنجام داوە و تێیدا تاوتوێی رەوشی یەمەن و هەڵسوکەوتی میلیشیاکانی حوسییان کردووە.
لە لێدوانێکدا بۆ ڕۆژنامەنووسان لە کۆشکی سپی، ترەمپ ئاماژەی بەوەدا، میلیشیاکانی حوسی بە شێوازێکی زۆر خراپ ڕەفتار دەکەن و ڕەنگە داوا لە تورکیا بکات دەستێوەردان لە یەمەن بکات.
لە تەوەرێکی تری قسەکانیدا، سەرۆکی ئەمریکا جارێکی تر ئێران بە "وڵاتی شکستخواردوو" وەسف کرد و جەختیشی کردەوە کە وڵاتەکەی لە کاتێکی زۆر نزیکدا بڕیار لەسەر پرسی ئێران دەدات. لە لای خۆیەوە، وتەبێژی وەزارەتی دەرەوەی ئەمریکا ڕای گەیاند کە واشنتۆن بەردەوام دەبێت لە پشتگیریکردنی سعودیە و هەمیشە لە پاڵیدا دەبێت.