بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام جەلال لە بەغدا، پێشوازی لە جۆشوا هاریس، هەڵسوڕێنەری باڵیۆزخانەی ئەمریکا لە عێراق کرد و پرسی پێکهێنانی حکومەتی هەرێمی کوردستان و دۆخی سیاسیی ناوچەکەیان تاوتوێ کرد.
لە کۆبوونەوەکەدا، سەرۆکی یەکێتی بە بۆنەی ڕۆژی سەربەخۆیی ئەمریکاوە، پیرۆزبایی ئاڕاستەی جۆشوا هاریس و گەلی ئەمریکا کرد.
هاوکات، لە چوارچێوەی گفتوگۆکاندا دوایین گۆڕانکارییەکانی دۆخی سیاسیی عێراق و ناوچەکە و پرسی پێکهێنانی حکومەتی نوێی هەرێمی کوردستان خرانەبەر باس.
بافڵ جەلال تاڵەبانی جەختی لە گرنگیی بەردەوامبوونی هەوڵە هاوبەش و دیپلۆماسییەکان کردەوە بە ئامانجی کەمکردنەوەی گرژییەکان و چەسپاندنی ئاشتی و سەقامگیریی هەمیشەیی لە ناوچەکەدا.