مەزڵوم عەبدی، فەرماندەی گشتیی هێزەکانی سووریای دیموکرات (هەسەدە)، ڕایگەیاند؛ پرۆسەی تێکەڵکردنی دامەزراوە سەربازی، ئەمنی و ئیدارییەکان لە ناو دەوڵەتی سووریادا کۆتایی پێ هاتووە و ڕێککەوتنەکانیان لەگەڵ حکومەتی دیمەشق چوونەتە قۆناغێکی نوێوە.
لە چاوپێکەوتنێکیدا لەگەڵ ئاژانسی هەواڵی هاوار، مەزڵوم عەبدی ئاماژەی بەوە کرد کە ئەم پرۆسەیە تەنیا یەکگرتنی یەکە سەربازییەکان ناگرێتەوە، بەڵکو هەماهەنگیی مەدەنی و خزمەتگوزارییەکانیش لەخۆ دەگرێت.
لە چوارچێوەی ئەم هەنگاوەدا، ئاسایشی حەسەکە و قامیشلۆ ڕادەستی وەزارەتی ناوخۆ کراون، و لەناو هەسەدەشدا فیرقەیەکی سەربازی پێکهێنراوە کە لە سێ لیوا و تیمێکی کۆبانێی سەر بە پارێزگای حەلەب پێک هاتووە.
هەروەها سەبارەت بە پرسی پەروەردە، عەبدی ڕایگەیاند کە دانوستانەکان بەردەوامن و بەپێی مەرسومی ژمارە ١٣ی ڕێکەوتی ١٦ی کانوونی دووەمی ٢٠٢٦، زمانی کوردی وەک زمانێکی نەتەوەیی پەسەند کراوە.