وەزارەتی بەرگریی ڕوسیا ڕایگەیاند، ڕوسیا و ئۆکرانیا ئاڵوگۆڕی دیلەکانیان دەسیپێکردووەتەوە و لە چوارچێوەی ئاڵوگۆڕەکەدا مۆسکۆ و کیڤ هەریەکەیان 193 سەربازیان ئاڵوگۆڕ کرد.
وەزارەتەکە لە ڕاگەیەنراوێکدا دەڵێت، ئەمریکا و ئیمارات نێوەندگیرییان کردووە بۆ گەڕانەوەی سەرباز و گۆڕینەوەی دیلەکان.
لە 11ـی نیساندا ڕوسیا و ئۆکرانیا، هەریەکەیان 175 سەربازی دیلی دیکەیان ئاڵوگۆڕ کرد، جگە لەوەش حەوت کەس لە دانیشتووانی ناوچەی کۆرسک گەڕانەوە بۆ مۆسکۆ.
ئاڵوگۆڕی دیلەکان بەگوێرەی ڕێککەوتنێکە لە نێوان هەردوو وڵات کە لە لە 5 و 6ـی ئازاردا ئەنجام دراوە و لە یەکەم ڕۆژی ئاڵوگۆڕەکەدا هەردوولا هەریەکەیان 200 دیلیان ئاڵوگۆڕ کرد و لە ڕۆژی دووەمیشدا 300 دیکەیان ئاڵوگۆڕ کرد.