پەرلەمانتارێکی ناوچەی هەورامان ڕایگەیاند، شارۆچکەی پاوە لە ڕۆژهەڵاتی کوردستان، توانای بەرزی هەیە بۆ ئەوەی ببێتە یەکێک لە ناوەندە سەرەکییەکانی کەرتی تەندروستی و چارەسەری پزیشکی لە ڕۆژئاوای ئێران.
هاوکات قایمقامی پاوەش ئاشکرای دەکات کە شارەکە مۆڵەتی فەرمیی گەشتیاریی پزیشکی و وەرگرتنی نەخۆشی دەرەکی پێدراوە.
ڕستگار یووسفی، نوێنەری پاوە و هەورامان لە پەرلەمانی ئێران، لە کۆبوونەوەیەکی هاوبەشدا لەگەڵ سەرۆکی زانکۆی زانستە پزیشکییەکانی کرماشان و بەرپرسانی تەندروستیی ناوچەکە ڕایگەیاند، بەهۆی بوونی پزیشکانی پسپۆڕ و لێهاتوو، زەمینەی گەشەپێدانی کەرتی تەندروستی لە پاوە لەبارە، بۆیە پێویستە دابینکردنی ئامێری پێشکەوتووی MRI و کەرەستەی دیکەی پزیشکی بۆ نەخۆشخانەی شارەکە بخرێتە پێشینەی کارەکانەوە.
یووسفی ئاماژەی بە پڕۆژە تەندروستییەکانی دیکەی ناوچەکەش کرد و وتی، پڕۆژەی نەخۆشخانەی ڕوانسەر لە ماوەیەکی کورتدا یەکلایی کراوەتەوە و ئێستا بودجەیەکی سەربەخۆی بۆ تەرخان کراوە.
پاوە؛ مۆڵەتی وەرگرتنی نەخۆشی دەرەکی پێدراوە
لەلایەکی دیکەوە، فەرزاد ئەڵماسی، قایمقامی پاوە لە کۆبوونەوەکەدا سەرنجی خستە سەر پێگەی گەشتیاریی ناوچەکە و ڕایگەیاند، نەخۆشخانەی "قودس" لە پاوە خاوەن توانایەکی باشە، بەڵام بەهۆی قەبارەی زۆری هاتوچۆی گەشتیارانی ناوخۆیی و دەرەکی، پێویستە تێڕوانینێکی فراوانتر بۆ کەرتی تەندروستیی شارەکە هەبێت.
قایمقامی پاوە ئاشکرای کرد: "پاوە مۆڵەتی فەرمیی بۆ پێشوازیکردن و وەرگرتنی نەخۆشی دەرەکی وەرگرتووە، بۆیە کوالێتیی ئەو خزمەتگوزارییە پزیشکییانەی لێرە پێشکەش دەکرێن، کاریگەریی ڕاستەوخۆیان لەسەر ڕەزامەندیی گەشتیارانی دەرەکی دەبێت."
کێشەی کەمیی کارمەند و پێویستیی بەهێزکردنی کەرتی تەندروستی لە مەرزی شوێشمێ
ئەڵماسی پێویستییەکی دیکەی گرنگی ناوچەکەی بۆ بەهێزکردنی خزمەتگوزاریی پزیشکی لە مەرزی "شوێشمێ" (هاوسنوور لەگەڵ هەرێمی کوردستان) گەڕاندەوە و جەختی کردەوە کە بەهۆی هاتوچۆی فراوانی گەشتیاران لەو مەرزەوە، دەبێت پزیشک، دەرمانی پێویست و فریاکەوتنی خێرا لەو ناوچەیەدا بەردەوام ئامادە بن.
قایمقامی پاوە لە کۆتاییدا هۆشداریی دا کە ژێرخانی نەخۆشخانەی قودس تا ڕادەیەکی زۆر تەواو بووە، بەڵام میلاکی هێزی مرۆیی و کارمەندان تێیدا هاوسەنگ نییە لەگەڵ ئەو قەبارە زۆرەی خزمەتگوزارییەی کە پێشکەشی دەکات، ئەمەش گوشارێکی زۆری خستووەتە سەر کادری پزیشکی؛ بۆیە داوای لە وەزارەتی تەندروستی و زانکۆی کرماشان کرد کێشەی کەمیی کارمەند لە پاوە بە زوویی چارەسەر بکەن.