بەگوێرەی ڕاپۆرتی میدیاکانی ئێران، پارێزگای ورمێ لە ڕۆژهەڵاتی کوردستان بە بەرهەمهێنانی ساڵانەی ٢٧ هەزار و ٩٠٣ تۆن هەنگوین، توانی پلەی یەکەمی لەسەر ئاستی ئێران بەدەست بهێنێت و وەک جەمسەری سەرەکیی ئەم پیشەسازییە دەستنیشان بکرێت.
لەم بارەیەوە، محەممەدرەزا ئەسغەری، سەرۆکی ڕێکخراوی کشتوکاڵی ورمێ ڕایگەیاند کە پارێزگاکە بە هەبوونی یەک ملیۆن و ٤٠٤ هەزار سندوقە هەنگ، ڕۆڵێکی سەرەکی لە دابینکردنی بازاڕی ناوخۆ و هەناردەکردنی هەنگوین بۆ وڵاتانی دیکە دەگێڕێت.
ئەسغەری ئاماژەی بەوەش کرد که بەرهەمهێنانی ئەم ڕێژەیە بووەتە هۆی ئەوەی ورمێ بەشدار بێت لە دابینکردنی ٢١٪ی کۆی بەرهەمی هەنگوینی ئێران، کە ئەمەش پێگەی تایبەت و بێڕکابەریی پارێزگاکە لە گەشەپێدانی پیشەسازیی هەنگەوانیدا دەردەخات، جەختیشی لەسەر کاریگەرییە ئەرێنییەکانی ئەم پیشەسازییە لە هەردوو بواری ئابووری و ژینگەییدا کردەوە.