لەچوارچێوەی پرۆسەی گەڕانەوەی ئاوارەکان بۆ سەر ماڵ و حاڵی خۆیان، بەیانیی ئەمڕۆ هەشتەمین کاروانی ئاوارەکانی عەفرین لە هەرێمی جزیرەی ڕۆژئاوای کوردستانەوە بەڕێکەوتن.
کاروانەکە لە ١٧٠٠ خێزان پێکهاتووە کە پێشتر لە شارەکانی قامیشلۆ و دێریک نیشتەجێ بوون.
ئەو ئاوارەن لە بازنەی "شەهید یوسف کێلۆ"لە قامیشلۆوە بەرەو شاری عەفرین بەڕێکەوتن و چاوەڕوان دەکرێت ئێوارەی ئەمڕۆ بگەنە شوێنی مەبەست.
ئەم گەڕانەوەیە لەسەر بنەمای ئەو ڕێککەوتنەی کانوونی دووەمی ئەمساڵە کە لە نێوان هێزەکانی سووریای دیموکرات (هەسەدە) و حکومەتی کاتی سوریا واژۆ کراوە، کە تێیدا مەرجی ئاسانکاری بۆ گەڕانەوەی ئاوارەکان بۆ سەر ماڵ و حاڵیان دانراوە.
جێگەی باسە، ئەمە هەشتەمین کاروانە کە لە ناوچەکانی جزیرە و کۆبانییەوە دەگەڕێنەوە.
پێشتر لە مانگەکانی ئادار، نیسان و ئایاردا، حەوت گروپی دیکەی ئاوارەکان بە هەمان رێوشوێن گەڕێندراونەتەوە بۆ شاری عەفرین و ناوچەکانی دەوروبەری.