لە بەردەوامیی شەپۆلی دەستبەسەرکردنی هاوڵاتییان لە ڕۆژهەڵاتی کوردستان، مێرمنداڵێکی تەمەن 16 ساڵ لەلایەن هێزە ئەمنییەکانی ئێرانەوە لە شاری سەرابڵە دەستبەسەر کرا و چارەنووسی نادیارە.
بەگوێرەی زانیارییەکانی ڕێکخراوەکانی مافی مرۆڤ لە ڕۆژهەڵاتی کوردستان، دوێنێ هێزە ئەمنییەکانی کۆماری ئیسلامیی ئێران هەڵیانکوتاوەتە سەر ماڵی مێرمنداڵێک بە ناوی (ئاروین حوسێنی) و دەستبەسەریان کردووە.
تەمەنی ئاروین 16 ساڵە و دانیشتووی شاری سەرابڵەی سەر بە پارێزگای ئیلامە لە ڕۆژهەڵاتی کوردستان. ڕێکخراوەکانی مافی مرۆڤ ئاماژە بەوە دەکەن کە دەستگیرکردنی ئەو مێرمنداڵە "بەبێ پیشاندانی چوارچێوە و مۆڵەتی یاسایی یان بڕیاری دادوەر بووە."
تاوەکو کاتی ئامادەکردنی ئەم هەواڵە، هێزە ئەمنییەکانی ئێران هیچ ڕوونکردنەوەیەکیان لەسەر هۆکاری دەستگیرکردنی ئاروین حوسێنی و ئەو تۆمەتانەی ئاڕاستەی کراون نەداوە، هەروەها شوێنی ڕاگرتنی و دۆخی تەندروستیشی بە نادیاری ماوەتەوە، ئەمەش بووەتە هۆی نیگەرانیی بنەماڵەکەی.
شاری سەرابڵە ناوەندی شارستانی سەرابڵەیە لە پارێزگای ئیلام و بەشێکی زۆری دانیشتووانەکەی کوردن. لە دوای خۆپێشاندانەکانی ساڵانی ڕابردووەوە، دەستبەسەرکردنی چالاکوانان و هاوڵاتییانی کورد لەو ناوچانە بە پاساوی جیاجیا لەلایەن دەزگا ئەمنییەکانی ئێرانەوە بەردەوامیی هەیە.