وه‌ك هاوسۆزییه‌ك بۆ به‌شه‌كانی دیكه‌ی كوردستان، خەڵکی شاری عامودا لە ڕۆژاڤای كوردستان ڕێپێوانێکی جەماوه‌رییان ئه‌نجامدا و داوای یەکێتیی نەتەوەییان کرد.
ئەمڕۆ چوارشه‌ممه دانیشتوانی شاری عامودا لە ڕۆژاڤای کوردستان، بە دروشمی "کاتی یەکێتی گەلی کوردە، باشور و ڕۆژهەڵاتی کوردستان تەنیا نین"، ڕێپێوانێکی بەرفراوانیان ئەنجامدا.
بەشداربووان جەختیان لەوه‌کردەوە، لەم قۆناغە هەستیارەدا پێویستە گەلی کورد لە هەموو بەشەکان یەکدەنگ بن، هاوکات داوای ئازادی جەستەیی عەبدوڵڵا ئۆجالان و ئازادکردنی ئەو کەسانەیان کرد لە لایەن حکومەتی کاتیی سوریاوە دەستبەسەرکراون.
لە ڕێپێوانەکەدا ئاراشک باراوی، گوتەبێژی یەکێتی ڕۆشنبیرانی هەرێمی جزیرە، گوتارێکی پێشکەشکرد و ڕایگەیاند، ئێمە لێرە پشتیوانیی خۆمان بۆ خەڵکی باشووری کوردستان لە دژی هێرشەکان دەرببڕین و ئەو هێرشانە سەرکۆنە دەکەین.
گوتیشی، هاوسۆزی و پشتیوانی خۆمان بۆ گەلی کورد لە هەموو بەشەکانی کوردستان بە تایبەت ڕۆژهەڵاتی کوردستان نیشان دەدەین.
