گەلی ئاشووری و کلدان هەموو ساڵێک لە ١ـى نیسان، سەرەتای وەرزی بەهار، جەژنی ئاکیتو بەڕێوەدەبەن و تێیدا چەندین چالاکى ئایینی و ڕۆشنبیری ئەنجام دەدرێن و پێیان وایە جەژنەکە سەرەتای ژیانێکی نوێیە و ئەمساڵیش لە ناوچەکانى سیزرێ مەراسیمەکە بەڕیوەدەبەن.
فێستیڤاڵی ئاکیتو یەکێکە لە فێستیڤاڵە کۆنەکانی مرۆڤایەتی، ڕەگ و ڕیشەی لە شارستانییەتە کۆنەکانی میزۆپۆتامیا و بەتایبەت شارستانیەتی سۆمەری و بابلی و ئاشوورییەوە سەرچاوە دەگرێت جەژنەکە بەو مانایە دێت کە سروشت لەم ڕۆژەدا و سەرەتای ساڵی نوێدا خۆی نوێ دەکاتەوە.
مێژووی فێستیڤاڵی ئاکیتو زیاتر لە چوار هەزار ساڵە و جەژنی ئاکیتو لە پەرستگای بابل و ئاشوور بە تایبەت پەرستگای مەردوک لە بابل بەڕێوە دەچوو .
لە شارستانییەتی ئاشوورییەکان بۆ ماوەی ١٢ ڕۆژ لەسەریەک جەژنی ئاکیتو بەڕێوەدەچوو و تێیدا قوربانی دەکرا بۆ خوداوەندەکان و بۆ ئاشوورییەکان جەژنى ئاکیتو هێمای سەرکەوتن بوو بەسەر شەڕانگێزى و نوێبوونەوەی پەیمانی نێوان خوداوەندەکان و مرۆڤەکان بووە.
