نانە بەیانییە ناودارەی شاری وانی باکووری کوردستان، بەهۆی دەوڵەمەندی و ڕەسەنایەتییەکەیەوە، بووەتە یەکێک لە گرنگترین براندە گەشتیاری، ئابووری و فەرهەنگییەکانی ناوچەکە و ساڵانە سەرنجی سەدان هەزار گەشتیار بۆ خۆی ڕادەکێشێت.
نەجدەت تەقوا، سەرۆکی ژووری بازرگانی و پیشەسازیی وان (Van TSO) ڕاگەیاند، نانی بەیانی وان تەنیا کلتوورێکی نانخواردنی بەیانیان نییە، بەڵکو هێمایەکی دێرینی پێکەوەژیان و بەخشندەیی کۆمەڵگەکەیە.
ناوبراو ئاماژەی بەوە کرد کە نانی بەیانی ئەم شارە ناوبانگێکی نێودەوڵەتی هەیە، بەتایبەت دوای ئەوەی لە ساڵی 2014دا بە کۆکردنەوەی 51 هەزار و 793 کەس کە لە یەک بۆ نانخواردن، توانی ڕیکۆردی پێشووی ئەمریکا بشکێنێت و ناوی وان لە کتێبی پێوانەیی گێنسدا تۆمار بکات.
سەرۆکی ژووری بازرگانیی وان، نهێنیی بەشێک لە دەوڵەمەندیی ئەم نانە بەیانییە دەگێڕێتەوە بۆ بوونی زیاتر لە 3 ملیۆن و 500 هەزار سەر مەڕومەڵات لە سنووری پارێزگای واندا، هۆکاری سەرەکیی کوالێتی بەرز و دەوڵەمەندیی بەرهەمە شیرەمەنییەکانی ئەم خوانەیە.
پێکهاتە سەرەکییەکانی ئەم سفرە کلتوورییە بریتین لە:
پەنیری کێوی (Otlu Peynir): کە بە گیای کێوی و بۆنخۆشی چیاکانی کوردستان دروست دەکرێت.
مورته‌غه (Murtuğa): پێکهاتەیەکی کلتوورییە لە ئارد، ڕۆنی کەرە و هێلکە.
کائوت (Kavut): جۆرە حەڵوایەکی کۆنی کوردییە کە لە گەنمی هاڕراو و دۆشاو یان هەنگوین دروست دەکرێت.
کەرە و هەنگوینی سروشتیی چیاکان.
هەروەها کۆڵەکەیەکی گرنگی گەشتوگوزار و ئابووری ئێستا لە شاری وانە کە زیاتر لە 100 هۆڵی فەرمی و گەورەی تایبەت بە پێشکەشکردنی نانی بەیانی کاردەکەن کە هەلی کاریان بۆ سەدان کەس ڕەخساندووە.
ئەم کلتوورە ڕۆڵێکی کارا دەگێڕێت لە ڕاکێشانی گەشتیاراندا، بە جۆرێک ساڵانە نزیکەی 1 ملیۆن گەشتیار کە زۆربەیان لە ئێران و ڕۆژهەڵاتی کوردستانەوەن، تەنیا بۆ تاقیکردنەوەی ئەم خوانە ڕەسەنە سەردانی وان دەکەن.
یوسف کۆناک، تەمەن 61 ساڵ، کە لە ساڵی 1975ەوە چێشتخانەی ناوداری (Bak Hele Bak) بەڕێوەدەبات و خۆی وەک "باڵیۆزی کلتووری نانی بەیانیی وان" دەناسێنێت، لەبارەی تێکەڵبوونی کلتوورەکانەوە دەڵێت؛
"لای ئێمە خزمەتی هەموو کەس دەکرێت بێ جیاوازی، لەنێو کلتووردا مرۆڤەکان هەن و هەمووان یەکسانن. لێرە ماڵی کلتووری نانی بەیانییە."
