نزار ئامێدی، سەرۆک کۆماری عێراق، لە دیدارێکدا لەگەڵ پەرلەمانتارانی ڕەوتی حیکمە، جەختی لە بەهێزکردنی هەماهەنگیی نێوان دەسەڵاتی جێبەجێکردن و یاسادانان کردەوە بۆ پەسەندکردنی ئەو یاسایانەی خزمەت بە بژێوی هاوڵاتیان و پرۆسەی چاکسازی دەکەن.
نزار ئامێدی، سەرۆککۆماری عێراق، پێشوازیی لە وەفدێکی پەرلەمانتارانی ڕەوتی حیکمەی نیشتمانی کرد. لە دیدارەکەدا، باس لە دوایین گۆڕانکارییەکانی عێراق و ناوچەکە و ئەو تەنگەژە سیاسی و ئەمنییانە کرا کە ڕووبەڕووی عێراق دەبنەوە.
سەرۆککۆماری عێراق ئاماژەی بەوە کرد، پاراستنی سەقامگیری و سەرخستنی پرۆسەی سیاسی پێویستی بە پشتیوانی پەرلەمان هەیە، بەتایبەت لە بواری داڕشتنی ئەو یاسایانەی ڕاستەوخۆ کار دەکەنە سەر باشکردنی بژێوی و پێداویستییەکانی هاوڵاتیان.
لای خۆیانەوە، پەرلەمانتارانی ڕەوتی حیکمە جەختیان لەوە کردەوە، ئامادەن کار بۆ هەماهەنگی زیاتر بکەن لە پێناو بەرژەوەندی گشتی و بەدیهێنانی ئەو چاکسازیانەی کە حکومەت و سەرۆکایەتی کۆمار پلانیان بۆ داناوە.