کەناڵی سی ئێن ئێنی ئەمریکی بڵاوی کردەوە، ئەمریکا هۆشداریی تووندی داوەتە ئۆکراین و وڵاتانی ئەوروپا کە ئەگەر کیێف بەردەوام بێت لە هێرشکردنەسەر قوڵایی خاکی ڕووسیا و دامەزراوەکانی وزە، واشنتن هاوکارییە هەواڵگرییەکان و فرۆشتنی چەک ڕادەگرێت.
بەپێی زانیارییەکانی سی ئێن ئێن کە لە زاری چەند سەرچاوەیەکەوە بڵاو کراونەتەوە، ئیدارەی ئەمریکا لە ڕێگەی وەزارەتەکانی دەرەوە و جەنگەوە، هەروەها لە پەیوەندییە ڕاستەوخۆکانی نێوان سوپای ئەمریکا و ئۆکراین، پەیامی خۆی گەیاندووەتە کیێف و هاوپەیمانە ئەوروپییەکانی.
ئەمە لە کاتێکدایە، دۆناڵد ترەمپ، سەرۆکی ئەمریکا پێشتر ڕایگەیاندبوو کە ڕووسیا بڕێکی زۆر سووتەمەنی دەخاتە بازاڕەوە و ڕێگرە لە گرانبوونی نرخی نەوت، بۆیە پێویستە ئۆکراین دەستبەرداری هێرشکردنەسەر دامەزراوەکانی وزەی ڕووسیا بێت.
بەرپرسێکی ئەوروپی بە کەناڵەکەی ڕاگەیاندووە، هاوکاریی هەواڵگری و دابینکردنی چەک دوو دەماری سەرەکیی مانەوەی ئۆکراینن و هەر هەڕەشەیەک بە ڕاگرتنیان، کێشەیەکی گەورە بۆ کیێف و هاوپەیمانەکانی دروست دەکات.