سکرتێری گشتیی ناتۆ بە مەبەستی تاوتوێکردنی پرسی پەرەپێدانی بەرگریی ئاسمانی و بەڕێوەچوونی کۆبوونەوەی لوتکەی سەرکردایەتی ناتۆ لە ئەنقەرە، سەردانی تورکیای کرد.
ئەمڕۆ مارک ڕوتە، سکرتێری گشتی ناتۆ لە سەردانەکەیدا بۆ ئەنقەرە، لەگەڵ ڕەجەب تایب ئەردۆغان، سەرۆککۆماری تورکیا و هەروەها هاکان فیدان، وەزیری دەرەوە و یاشار گولەر وەزیری بەرگریی ئەو وڵاتە دیداری ئەنجامدا.
ڕەجەب تایب ئەردۆغان دوای کۆبوونەوەی لەگەڵ سکرتێری گشتیی ناتۆ ڕایگەیاند، ناسەقامگیری ناوچەکە جارێکی دیکە گرنگیی هاوکاری و هاودەنگیی نێوان هاوپەیمانانی ناتۆی ئاشکرا کرد.
ئەردۆغان گوتیشی، چاوەڕوان دەکات لە کۆبوونەوەی لوتکەی سەرکردەکانی ناتۆ لە ئەنقەرە بڕیارێک بدرێت، هاودەنگیی نێوان هاوپەیمانان بەهێزتر بکات و پاڵپشتی لە ئامادەکاریی بەردەوام بکات لە ناو هاوپەیمانییەکە بەرانبەر بە قەیرانەکان.
هاوکات یاشار گولەر وەزیری بەگری تورکیا ڕایگەیاند، لە کۆبوونەوەکەدا کۆمەڵە پرسێکی گرنگ بە ئامانجی پتەوکردنی پەیوەندییەکانی هاوپەیمانی و پرسی پەرەپێدانی بەرگریی ئاسمانی تاوتوێ کراون.
ئەم سەردانەی مارک ڕوتە لەکاتێکدایە، گرژییەکانی نێوان ئەمریکا و ناتۆ ڕووی لە هەڵکشان کردووە، بەجۆرێک لە چەند هەفتەی ڕابردوودا دۆناڵد ترەمپ، سەرۆکی ئەمریکا ڕایگەیاند، بە شێوەیەکی جددیی هەڵسەنگاندن بۆ ئەندامیەتی وڵاتەکەی دەکات لە ناتۆدا.