لە هەڵسەنگاندنێکی نوێدا بۆ پێشهاتە سەربازی و مەیدانییەکان، دۆناڵد ترەمپ سەرۆکی ئەمریکا ئاشکرای کرد کە توانا سەربازییەکانی ئێران بە تەواوەتی لاواز کراون و وڵاتەکە چیتر هیچ هێزێکی دەریایی، ئاسمانی و سیستمی بەرگریی دژە فڕۆکەی بەدەستەوە نەماوە.
ترەمپ ئاماژەی بە دۆخی گواستنەوەی نەوت لە ناوچەکەدا کرد و گوتی: "دوێنێ 28 ملیۆن بەرمیل نەوت بە گەرووی هورمزدا تێپەڕیوە کە ئەمەش زیاترە لە هەر کاتێکی ڕابردوو، بەڵام ڕێگە بە هیچ کەسێک و هیچ کەشتییەک نادەین کە بەرەو ئێران بچێت یان لە ئێرانەوە تێپەڕێت."
لە کۆتایی لێدوانەکەیدا، سەرۆکی ئەمریکا گەشبینیی خۆی دەربڕی لەسەر ئاڕاستەی ڕووداوەکان و جەختی کردەوە کە ئەم شەڕە و ململانێ سەربازییانەی لەگەڵ ئێراندا هەن "زۆر بە زوویی کۆتایییان دێت."