دۆناڵد ترەمپ، سەرۆکی ئەمریکا لە چاوپێکەوتنێدا لەگەڵ کریستن وێڵکەر لە بەرنامەی (Meet the Press)ی کەناڵی (NBC News) رایگەیاند کە سەرکردەکانی ئێران تاوەکو ئێستا رێککەوتنی کۆتاییان بۆ راگرتنی جەنگ واژۆ نەکردووە و ئێرانی بە وڵاتێکی "بەهێز" و "خۆبەزلزان" وەسف کرد کە بۆی ئاسان نییە داخوازییەکانی واشنتن قبوڵ بکات.
هەروەها پێداگری لەسەر ئەوە کرد کە دواجار هیچ بژاردەیەکی دیکەیان نییە و ناچارن بگەنە رێککەوتن.
ئەم لێدوانانەی ترەمپ لەکاتێکدان کە جەنگی نێوان هەردوو وڵات چووەتە چوارەم مانگی خۆیەوە و سەرەڕای ئاگربەستی مانگی نیسان، بەهۆی هێرشە درۆنی و مووشەکییەکان لە نزیک گەروی هورمز گرژییەکان دووبارە سەریان هەڵداوەتەوە.
هاوکات مارکۆ روبیۆ، وەزیری دەرەوەی ئەمریکا رایگەیاندووە هێرشەکانیان بەرامبەر ئێران کۆتایی هاتووە و هێرشەکانیان تەنیا بەرگری بووە لەسەر ئەو بنەمایەی ئەگەر تاران تەقە نەکات ئەوانیش تەقە ناکەن، لەلایەکی دیکەوە داخرانی گەروی هورمز و بەرزبوونەوەی نرخی سووتەمەنی.
لە کۆتاییدا سەرۆکی ئەمریکا ئاماژەی بەوە کرد کە زۆربەی کارگەکانی درۆن و سەکۆکانی مووشەکی ئێرانیان تێکشکاندووە و شوێنی ئەوانەی دیکەش دەزانن، بەڵام دانی بەوەدا نا کە هێشتا نزیکەی 21٪ بۆ 22٪ی توانای مووشەکیی تاران ماوە و هۆشداریی دا ئەگەر تاوەکو مانگی ئەیلول رێککەوتن نەکرێت، رێگەیەک دەگرنەبەر کە رێگەیەکی خۆش نابێت.