دۆناڵد ترەمپ، سەرۆکی ئەمریکا، لە ڕێگەی بڵاوکردنەوەی وێنەیەکی دروستکراو بە ژیریی دەستکرد لە هەژماری فەرمیی خۆی لە تۆڕی کۆمەڵایەتی "ترووس سۆشیاڵ"، جارێکی دیکە سەرنجی میدیا و ناوەندە سیاسییەکانی جیهانی ڕاکێشایەوە و گومان و دەنگۆکانی سەبارەت بە ئەگەری هەڵگیرسانی گرژیی سەربازیی نوێ لە نێوان واشنتن و تاران گەیاندە لوتکە.
لەو وێنە ستایلە سینەماییەدا، ترەمپ لەسەر کەشتییەک لە ناوەڕاستی دەریایەکی شڵەژاودا لەگەڵ فەرماندەیەکی هێزی دەریایی ئەمریکا وەستاوە و لە بەرانبەریشدا چەند کەشتییەکی دیکە دەبینرێن کە یەکێکیان ئاڵای ئێرانی پێوەیە، لە کاتێکدا سەرۆکی ئەمریکا لەسەر وێنەکە نووسیویەتی، "ئەمە ئارامیی پێش زریان بوو".
ئەم پەیامە توند و ناڕوونەی ترەمپ لە کاتێکدایە کە ناوچەی ڕۆژهەڵاتی ناوەڕاست بە قۆناغێکی هەستیاری پڕ لە ململانێدا تێپەڕ دەبێت.