دوای بڵاوبوونەوەی چەند ڕاپۆرتێکی نێودەوڵەتی لە بارەی نزیکبوونەوەی ئەمریکا و ئێران لە ڕێککەوتن بۆ کۆتاییهێنان بە جەنگ، ئیسماعیل بقایی، گوتەبێژی وەزارەتی دەرەوەی ئێران ڕۆژی چوارشەممە بە ئاژانسی ئیسنای ڕاگەیاند، "پڕۆژە و پێشنیازەکەی ئەمریکا هێشتا لەلایەن ئێرانەوە لە ژێر لێکۆڵینەوەدایە".
ئاماژەی بەوەش کردووە، تاران دوای کۆبەندی کۆتایی، سەرنج و تێبینییەکانی خۆی لە ڕێگەی پاکستانەوە دەگەیەنێتە واشنتن.
هاوکات ئاژانسی تەسنیم، نزیک لە سوپای پاسداران لە زاری سەرچاوەیەکی ئاگادارەوە بڵاوی کردەوە، دوایین پێشنیازی ئەمریکا کۆمەڵێک بڕگەی قبوڵنەکراوی تێدایە و ئێران هێشتا وەڵامی نەداوەتەوە.
هەروەها ئاژانسی فارس، ڕاپۆرتەکانی ئاکسیۆس و ڕۆیتەرزی لە بارەی نزیکبوونەوەی ڕێککەوتنەکە ڕەت کردەوە و بانگەشەی ئەوەی کرد، هیچ پەیامێکی نوێی نووسراو لە نێوان ئەو دوو وڵاتدا ئاڵوگۆڕ نەکراوە.
میدیاکانی ئێران دەڵێن، ئەم هەواڵانە لە میدیا جیهانییەکاندا، هەوڵێکە بۆ دروستکردنی کاریگەریی لە سەر بازاڕە جیهانییەکان و دابەزاندنی نرخی نەوت.
ئەمە لە کاتێکدایە، سەرچاوە ڕۆژئاواییەکان باس لە تێگەیشتنێکی یەک لاپەڕەیی دەکەن بۆ کۆتاییهێنان بە ململانێ سەربازییەکانی ئەم دواییە.