دەزگای دادوەریی ئێران ڕایگەیاند کە سزای لەسێدارەدانیان بەسەر هاوڵاتییەکدا بە ناوی "غۆلامڕەزا خانی شەکاراب" جێبەجێ کردووە، ئەوەش دوای ئەوەی لەلایەن دادگاوە بە تۆمەتی "سیخوڕیکردن بۆ ئیسرائیل" تاوانبار کرابوو و حوکمەکەشی لەلایەن دیوانی باڵای وڵاتەوە پەسند کرابوو.
ئاژانسی "میزان"ی زمانحاڵی دەزگای دادوەریی ئێران ئاشکرای کردووە کە ئەم کەسە پێشتر لە یەکێک لە پارێزگاکانی ئێران سەرپێچیکار بووە و پیشینەی شەڕانگێزیی هەبووە.
هەروەها بەپێی گوتەی دادگاکە و پشتبەستن بە دانپێدانانەکانی، یەکێک لە گرنگترین ئەو ئەرکانەی لەلایەن دەزگای مۆسادی ئیسرائیلییەوە پێی سپێردرابوو، چوون بووە بۆ یەکێک لە وڵاتانی ناوچەکە بە مەبەستی چاودێریکردن و ئامادەکاری بۆ تیرۆرکردنی حاخامێکی جوولەکە.
ئاژانسەکە ئاماژەی بەوەش کردووە کە ناوبراو لە ڕێگەی "ئۆپەراسیۆنێکی ئاڵۆزی هەواڵگرییەوە" کێشکراوەتە ناوخۆی ئێران و لەلایەن هێزەکانی سەر بە سوپای پاسدارانەوە دەستگیر کراوە.
ئەمەش لە کاتێکدایە کە دوای دەستپێکردنی شەڕی ئەمریکا و ئیسرائیل، تا ئێستا زیاتر لە 30 زیندانیی پەیوەندیدار بە دۆسیە سیاسی و ئەمنییەکان لە ئێران لەسێدارەدراون و هاوکات ڕێکخراوەکانی مافی مرۆڤیش گومان و نیگەرانیی قووڵیان لەسەر نەبوونی دادگاییکردنی دادپەروەرانە و بێبەشکردنی ئەم تۆمەتبارانە لە مافی هەبوونی پارێزەر دەربڕیوە.