مەسرور بارزانی، سەرۆکی حکومەتی هەرێمی کوردستان، بەبۆنەی هاتنی جەژنی پیرۆزی قوربانەوە پەیامێکی بڵاوکردەوە و تێیدا گەرمترین پیرۆزبایی ئاراستەی گشت موسڵمانانی هەرێمی کوردستان، عێراق و جیهان کرد، هیوای خواست ئەم بۆنەیە خێر و بەرەکەت بۆ هەموان بهێنێت.
سەرۆکی حکومەتی هەرێمی کوردستان لە پەیامەکەیدا، بە تایبەتی پیرۆزبایی لە "پێشمەرگە، هێزەکانی ئاسایشی ناوخۆ و کەسوکار و بنەماڵەی شەهیدان و ئەنفالکراوان" کرد و ڕێزلێنانی خۆی بۆ قوربانییەکانیان دووپاتکردەوە.
هاوکات هیوای خواست هاونیشتمانیان ڕۆژانی جەژن لە ناو کەشێکی پڕ لە خۆشی، ئارامی و شادیدا بەسەر ببەن.
مەسرور بارزانی لە کۆتایی پەیامەکەیدا هیوای ئاشتی و پێکەوەژیانی بۆ ناوچەکە خواست و ڕایگەیاند، "ئومێدەوارم جەژن ببێتە مایەی ئاشتی و تەناهی و تەبایی و سەقامگیری لە کوردستان و ناوچەکە و جیهان."