Serokwekîlê Koma Partiya Wekhevî û Demokrasiyê ya Gelan Sezaî Temellî, li ser geşedanên di rojevê de li Meclisê daxuyanî da.
Sezaî Temellî destpêkê behsa çalakiyên karkerên madenê û êrîşên polîsan li dijî wan kir û xwest ku heqê karkeran bên dayin.
Temellî, balkişand ser sererastkirinên qanûnî yên diviyabû di çarçoveya Pêvajoya Aştî û Civaka Demokratîk de bihatina kirin û wiha got:
“Beriya Cejna Remezanê gotin dê qanûnan derxin, niha dibêjin em ê piştî cejnê bên Meclisê.
Vaye Cejna qurbanê tê.
Ev kar tenê bi gotin û hêviyan nabe.
Êdî divê qanûn beriya cejna Qurbanê werin derxistin.”
"Ji bo dan û standin bi pêş bikevin divê şertên jiyanê yên birêz Ocalan baş bibin"
Sezaî Temellî li ser girîngiya rola rêberê PKK`ê Abdullah Ocalan a di pêvajoyê de, wiha anî ziman:
“Pêwîst e hevdîtinên di navbera birêz Abdullah Ocalan û rayedarên dewletê de veguherin zemîneke demokratîk û hiqûqî.
Ji bo dan û standin baş pêş bikevin, divê şert û mercên jiyan û xebatê yên birêz Ocalan baş bibin.
Divê tekez bingeha vê ya zagonî hebe.”
