Li navçeya Qoserê ya ser bi parêzgeha Mêrdînê li Bakurê Kurdistanê, hêzên ewlehiyê yên Tirkiyeyê di saetên berya sibehê de operasyoneke hevdem birin ser çend navnîşanan. Di vê operasyonê de, hêzên tîmên taybet bi ser malan de girtin û sê kesên bi navên S. A., R. K. û R. L. binçav kirin.
Li gorî dîmenên ku ji aliyê cîran û şahidên rûdanê ve bi telefonên mobîl hatine qeydkirin, tê dîtin ku hêzên ewlehiyê bi tundî dikevin nav malê û endamên malbatê li ser erdê dirêj dikin. Ev şêwazê mudaxeleyê û nêzîkatiya li pêşberî çavên zarokan, li ser torên civakî û di nav gel de bû sedema nerazîbûneke pir mezin.
Heta niha ji aliyê rayedarên fermî ve daxuyaniyek li ser sedem û hinceta vê operasyonê nehatiye dayîn û nehatiye eşkere kirin ka ev kes bi çi tên tohmetbar kirin.
Hat ragihandin ku her sê kesên binçavkirî ji bo girtina îfadeyan birine Rêveberiya Ewlehiyê ya Navçeya Qoserê û lêpirsîna wan berdewam dike.
