Rêveberê Giştî yê Kompanyaya Rêhesin a Ukraynayê Oleksandr Pertsovsky, di daxuyaniyekê de li ser hesabê xwe yê Facebookê ragihand ku fuzeyên balîstîk ên Rûsyayê depoyeke trênan û dezgehên din ên rêhesinê li Kîevê kirine armanc. Di encama vê êrîşê de agir bi avahiyan ket û 7 kesan jiyana xwe ji dest da, ku 6 ji wan xebatkarên pargîdaniya rêhesinê bûn. Her wiha hat diyarkirin ku xebatkarekî din jî birîndar bûye û rakirine nexweşxaneyê.
Ji aliyê din ve, Wezareta Parastinê ya Rûsyayê daxuyand ku wan bi şev êrîşên berfireh bi çekên pir hesas û dronan birine ser navendên pîşesaziya leşkerî, sotemenî û enerjiyê li Kîev û derdora wê. Moskovayê destnîşan kir ku di heman demê de binesaziya benderên Odessa û Chornomorskê ku ji bo hilanîna barên leşkerî û sotemeniyê tên bikaranîn, hatine armancgirtin û zirar dîtine.
