Wezareta Karên Derve ya Îraqê bi Dewletên Yekbûyî yên Amerîkayê re ji bo radestkirina cihê piştgiriya dîplomatîk li Balafirgeha Navneteweyî ya Bexdayê peymanek imze kirin.
Ev yek di merasîmek ji bo radestkirina cihê piştgiriya dîplomatîk a Balyozxaneya Amerîkayê li Balafirgeha Navneteweyî ya Bexdayê de pêk hat.
Peyman ji hêla Cîgirê Wezîrê Têkiliyên Dualî, Balyoz Mihemed Husên Behr El-Ulûm, ku nûnertiya Hikûmeta Komara Îraqê dike û Berpirsê Karûbarên Demkî yê Balyozxaneya Amerîkayê li Îraqê, Balyoz Steven Fagin, ku nûnertiya hikûmeta Amerîkayê dike, ve hat îmzekirin.
Ajansa Nûçeyan a Şefeq ragihand ku Wezaretê di daxuyaniyeke çapemeniyê de diyar kir ku "ev gav di çarçoveya hewldanên hikûmeta Îraqê de ye ji bo temamkirina prosedurên têkildarî bidawîkirina mîsyona hevpeymaniya navneteweyî û hebûna leşkerî ya biyanî li Îraqê, li gorî dema diyarkirî ya 30`yê îlona 2026`an."
Li gorî daxuyaniyê, Cîgirê Wezîrê Têkiliyên Dualî girîngiya vê gavê ji bo xurtkirina têkiliyên Îraqî-Amerîkî û veguheztina wan bo qonaxek nû ya hevkariyê di gelek warên berjewendiya hevbeş de, bi taybetî di warên aborî, pêşketinî, enerjî û yên din de, tekez kir.
Ji aliyê xwe ve, Fagen piştgiriya hikûmeta xwe ji bo hewldanên hikûmeta Îraqê ji bo pêşxistina têkiliyên di navbera Bexda û Washingtonê de, li ser bingeha peyman û têgihîştinên di navbera her du welatan de hatine çêkirin, bi awayekî ku rêz li serweriya wan bigire û di vê qonaxê de asoyên nû ji bo hevkariya hevbeş veke, anî ziman.
