ڕوانگەی سوری بۆ مافەکانی مرۆڤ (سۆهر) ڕایگەیاند، تێمێکی 250 کەسی لە دەزگەی هەواڵگری تورکیا "میت" و تیمێکی پسپۆڕی تورکیا بە بیانووی پاراستنی هێزە ئەمنییەکانی حکومەتی کاتیی سوریا بەدوای شوێنەواری مێژوویی لە ناوچە کوردییەکانی پارێزگای حەلەب گەڕاون و دەستییان بەسەر چەندین شوێنەواردا گرتووە.
ڕوانگەکە لە ڕاگەیەنراوێکدا دەڵێت، تیمێکی تورکیا بە بیانووی پاراستنی هێزە ئەمنییەکانی حکومەتی کاتیی سوریا لە شارۆچکەی "تل ئەرەن" کە زۆربەی دانیشتووانەکەی کوردنشینن و دەکەوێتە ڕۆژهەڵاتی پارێزگای حەلەب دەستییان بەسەر چەندین سندوق لە کەلوپەلی مێژووییدا گرتووە و لەگەڵ خۆیاندا بەرەو شوێنێکی نادیار گواستوویانەتەوە.
ئاماژە بەوەشکراوە، بۆ ماوەی چەندین ڕۆژ شوێنەکە لەژێر گەمارۆی چڕی تیمە تورکییەکەدا بووە و چەند جارێک بۆ دوورخستنەوەی هاوڵاتییانی کوردی ناوچەکە گولەیان ئاڕاستەی ئاسمان کردووە.
ئەوەش هاتووە، دانیشتووانی تل ئەرەن داوای پاراستنی شوێنەوارە مێژووییەکان و لێپرسینەوەی بەپەلە لەم بابەتە دەکەن.