ئەمڕۆ ڕۆژی جیهانی "ڕیسایکلین" دووبارە بەکارهێنانەوەیە، ئامانج لەم ڕۆژە هاندانی دامەزراوە، کۆمپانیا و تاکەکانە بۆ دووبارە بەکارهێنانەوەی پاشماوەکان، لەپێناو پاراستنی سەرچاوە سروشتییەکان بۆ نەوەکانی داهاتوو.
بەگوێرەی ڕاپۆرتە ژینگەییە جیهانییەکان، ساڵانە بڕێکی زۆر پاشماوە بەرهەم دێت، بە جۆرێک لە وڵاتە پێشکەوتووەکانی وەک ئەڵمانیا و کۆریای باشور، ڕێژەی ڕیسایکلین لە نێوان 50٪ بۆ 65٪ دایە. بەڵام لە وڵاتانی تازەپێگەیشتوووکان ڕێژەی ڕیسایکلین زۆر نزمە و زۆربەی پاشماوەکان تەنها ژێرخاک دەکرێن یان دەسووتێنرێن.
ئەم ئامارانە نیشانی دەدەن، کە جیهان پێویستییەکی زۆری بە گۆڕینی کەلتوری بەکاربردن و زیادکردنی کارگەکانی ڕیسایکلین هەیە بۆ پاراستنی سەرچاوە سروشتییەکان.
بەگوێرەی ئامارەکانی دەستەی پاراستن و چاککردنی ژینگەی هەرێمی کوردستان، بڕی پاشماوەکان لە هەرێمی کوردستان بەم شێوەیە:
پاشماوەی هەر تاکێک ڕۆژانە نزیکەی 1.2 کیلۆگرام پاشماوەیە، کە ئەمەش لە تێکڕای جیهانی بەرزترە.
زیاتر لە 45٪ بۆ 50٪ـی پێکهاتەی پاشماوەکان، خواردن، پاشان پلاستیک و کاغەزن و ڕیسایکلین لە هەرێمی کوردستان زۆر نزمە و بە کەمتر لە 1٪ بۆ 2٪ دەخەمڵێنرێت.
ئاماژە بەوەشکراوە، نزیکەی 90٪یی پاشماوەکان تەنها کۆدەکرێنەوە و لە شوێنە کراوەکاندا فڕێ دەدرێن یان "ژێرخاک" دەکرێن بەبێ ئەوەی سوودیان لێ وەربگیرێتەوە.
ئاستەنگە سەرەکییەکانی ڕیسایکلین لە هەرێمی کوردستان
نەبوونی جیاکردنەوە لە سەرچاوە: هاووڵاتییان پاشماوەکان جیا ناکەنەوە (هەموو جۆرەکان لە یەک زبڵداندان)، ئەمەش پرۆسەی ڕیسایکلین زۆر گران و قورس دەکات.
کەمی کارگەی مۆدێرن: تا ئێستا کارگەی گەورە و پێشکەوتوو کە بتوانێت هەموو جۆرە پاشماوەکان لە یەکتر جیا بکاتەوە و ڕیسایکلینیان بکات بوونی نییە.
لە ئێستادا لە هەرێمی کوردستان، چەند پڕۆژەیەکی "وەبەرهێنانی پاشماوە" لە شارەکانی وەک سلێمانی و هەولێر و دهۆک دەستیان پێکردووە، بەڵام هێشتا نەگەیشتوونەتە ئەو ئاستەی کە ببنە چارەسەرێکی بنەڕەتی بۆ هەموو پاشماوەکان.
