بە گوێرەی پێشبینییەکانی بەڕێوەبەرایەتی کەشناسی و بومەلەرزەزانیی سلێمانی کە بۆ "نوچەتیڤی"ـی ناردووە، شەپۆلێکی تۆز و خۆڵ ناوچەکانی هەرێم دەگرێتەوە، بەتایبەت لە ناوچەکانی سنووری ڕۆژهەڵات و گەرمیان.
کەشناسیی ڕاشیگەیاندووە، ئەم دۆخە سبەی سێشەممەش بەردەوام دەبێت. مەودای بینین لە نێوان سێ بۆ پێنج کیلۆمەتر دەبێت و لە کاتی چڕبوونەوەی تۆزەکەشدا لە هەندێک ناوچە دەگاتە کەمتر لە یەک کیلۆمەتر.
هاوکات لەگەڵ خۆڵبارینەکە، پلەکانی گەرما روو لە نزمبوونەوە دەکەن. کەشناسیی ئاماژەی بەوەکردووە، پلەکانی گەرما ئەمڕۆ 3 بۆ 4 پلە و سبەی سێشەممەش 1 بۆ 2 پلەی دیکە نزم دەبنەوە.
هەروەها لە ناوچە شاخاوییە سنوورییەکانی باکور و ڕۆژهەڵاتی کوردستان ئەگەری نمەباران و هەورەبروسکەی کورتخایەن هەیە.
پلەکانی گەرمای سبەی سێشەممە بەم جۆرەدەبێت؛ هەولێر 26 پلە، سلێمانی و هەڵەبجە 25 پلە، دهۆک 24 پلە، گەرمیان و چەمچەماڵ 28 پلە، و حاجی ئۆمەران 16 پلە.