سەرەڕای گرژییە سەربازییەکانی ناوچەکە و سەرهەڵدانی شەڕی نێوان ئێران و هاوپەیمانان لە مانگی شوباتی ڕابردووەوە کە تێیدا خاکی سعودییە ڕووبەڕووی هێرشی مووشەکی و درۆنی بووەتەوە، پڕۆسەی حەجکردنی ئەمساڵ بەردەوامیی هەیە.
تاوەکو ئێستا زیاتر لە ملیۆنێك و 500 هه‌زار كه‌س لە ڕێگەی دەروازە جیاوازەکانەوە گەیشتوونەتە ئەو وڵاتە.
بە گوێرەی ڕاگەیێندراوی شاندی وه‌زاره‌تی ئه‌وقاف و كاروباری ئاینیی هه‌رێمی كوردستانیش، پێنج هه‌زار و 120 هاوڵاتی هەرێم (کە پێکهاتوون لە 2,368 ژن و 2,752 پیاو) بە سەلامەتی گەیشتوونەتە شاری مەککە.
ئەم پڕۆسەیە لە کاتێکدایە کە وڵاتانی ڕۆژاوای وەک ئەمریکا، بەریتانیا و ئەڵمانیا هۆشداریی توندی گەشتکردنیان داوەتە هاووڵاتیانیان، بەڵام بە گوتەی ئەنجومەنی باڵای موسڵمانان لە ئەڵمانیا و بەرپرسانی وڵاتانی ئیسلامیی وەک ئەندۆنیزیا (کە 221 هەزار حاجی ناردووە) و تەنانەت خودی ئێرانیش (کە 30 هەزار حاجی هەیە)، پاڵنەری بەهێزی ئاینی و تێچووی دارایی پێشوەختە وایکردووە کە حاجیان گەشتەکانیان هەڵنەوەشێننەوە.
لەلایەکی دیکەوە، شەڕەکە بارگرانییەکی زۆری دارایی و لۆجستی دروستکردووە؛ نرخی بلیتەکانی فڕۆکە بەهۆی گۆڕینی ڕێڕەوە ئاسمانییەکان و گرانبوونی سووتەمەنی بەرزبووەتەوە و کۆمپانیاکانی دڵنیایی گەشتیش (تەئمین) ئامادە نین زیانەکانی کاتی جەنگ بگرنە ئەستۆ، مەگەر بە پارەیەکی زۆر زیاتر.
هەرچەندە حکومەتی سعودییە سیستمی بەرگریی پاتریۆت و چەکی لەیزەری لە دەوروبەری شوێنە پیرۆزەکان جێگیرکردووە، بەڵام شیکەرەوانی سەربازی هێشتا هۆشداری لە مەترسیی کەوتنەخوارەوەی پاشماوەی مووشەکە تێكشکێنراوەکان یان لێکەوتەکانی تیشکدانی ئەگەریی لە کاتی بەئامانجگرتنی وێستگەی ئەتۆمیی بوشەهر دەدەن.