سبەی گەشتە ئاسمانییەکانی عێراق لەگەڵ دوبەی و ڕۆژی شەممەی داهاتووش لەگەڵ تورکیا دەستپێدەکاتەوە.
وەزارەتی گواستنەوەی عێراق لە ڕاگەیەنراوێكدا ئاماژەی بەوەکردوە، سبەی پێنجشەممە گەشتە ئاسمانییەکانی نێوان عێراق و دوبەی دەستپێدەکاتەوە گەشتەکەش لە ڕێگەی هێڵی ئاسمانیی عێراقەوە دەبێت.
هاوکات ئاماژەی بەوەشکردوە، ڕۆژی شەممەی هەفتەی داهاتوو گەشتە ئاسمانییەکانی عێراق و تورکیا بۆ فڕۆكەخانەی سەبیحە دەستپێدەكەنەوە.
لەبەشێکی دیکەی ڕاگەیەنراوەکەدا هاتووە، پاش ئاسایی‌بوونەوەی دۆخەکە و ڕاگرتنی جەنگ، عێراق خەریکە قۆناغ بە قۆناغ گەشتە ئاسمانییەکانی دەستپێدەکاتەوە.
پاش داخستنی ئاسمانی عێراق بە ڕووی گەشتە ئاسمانییەکان لە ماوەی جەنگی نێوان ئێران و ئەمریکا-ئیسرائیل، لە دوای ئاگربەستە دووهەفتەییەکە لە ڕۆژی هەینی ڕابردووەوە، عێراق ئاسمانی وڵاتەکەی کردەوە گەشتەكانی بۆ فڕۆكەخانەكانی عوممان و میسڕ و هیندستان دەستپێكردەوە.