ئەمڕۆ سێشەممە، 12ی ئایاری 2026، جوتیارانی کورد لە گوندەکانی سنوری ناحیەی سەرگەڕانی سەر بە پارێزگای کەرکوک، بەهۆی ڕێگرییەکانی سوپای عێراق لە گواستنەوەی بەرهەمە کشتوکاڵییەکانیان و دروستکردنی ئاستەنگ بۆ کارەکانیان، گردبوونەوەیەکی بەرفراوانی ناڕەزایەتییان ئەنجامداو ڕێگەی سەرەکی و ستراتیژیی نێوان کەرکوک و مووسڵیان لە نزیک گوندی شەعەل بە تەواوی بەڕووی هاتوچۆدا داخست.
جوتیارانی ناوچەکە دەڵێن کە ڕێگرییەکان زیانی زۆریان لێداون و مەترسی لەسەر تێکچوونی بەرهەمەکانیان دروست کردووە، بۆیە وەک کاردانەوەیەک پەنایان بۆ داخستنی ڕێگەکە بردووە.
لە هەمان کاتدا هێزێکی زۆری سوپای عێراق ڕەوانەی ناوچەکە کراون و هەوڵی بڵاوەپێکردنی خۆپێشاندەران دەدەن، بەڵام جوتیاران لە ڕێگەی بڵاوکردنەوەی چەند گرتەیەکی ڤیدیۆییەوە لە تۆڕە کۆمەڵایەتیەکان ڕایانگەیاندووە کە سوورن لەسەر داواکارییەکانیان و تاوەکو ڕێگەی فەرمی بۆ تێپەڕبوونی بەرهەمە کێڵگەییەکانیان نەکرێتەوە، بە هیچ شێوەیەک ڕێگەکە ناکەنەوە و کۆتایی بە چالاکییەکەیان ناهێنن.