ڕۆژنامەی "تەلەگراف"ـی بەریتانی ئەمڕۆ 13ی ئازاری 2026، لە ڕاپۆرتێکدا ئاماژەی بەوە کردووە، ململانێکانی ئێستای ڕۆژهەڵاتی ناوەڕاست و بەتایبەت جەنگی ئێران، بوونەتە هۆی بەرزبوونەوەی بەرچاوی نرخی نەوت لە بازاڕەکانی جیهان، ئەمەش وەک دەرفەتێکی زێڕین یارمەتی مۆسکۆ دەدات بۆ دابینکردنی خەرجییە داراییەکانی کەمپەینە سەربازییەکەی لە ئۆكراین.
به گوێره‌ی ڕاپۆرتەکە، هەرچەندە ڤلادیمێر پوتین سەرۆکی ڕوسیا، لە پەیوەندییەکی تەلەفۆنیدا لەگەڵ دۆناڵد ترەمپ سەرۆکی ئەمریکا، پەرۆشیی خۆی بۆ گەیشتن بە چارەسەرێکی سیاسیی و دیپلۆماسیی خێرا بۆ جەنگی ئێران دەربڕیوە، بەڵام لە ڕاستیدا هەڵگیرسانی ئەم جەنگە بۆ سەرۆکی ڕوسیا هێندەش خراپ نەبووە.
ڕۆژنامە بەریتانییەکە ئاماژه‌ی بۆ ئه‌وه‌ش كردووه، چەند ڕۆژێک له‌مه‌وبه‌ر، کۆشکی كریملن ڕووبەڕووی قەیران و پرسیاری جدی ببووەوە سەبارەت بە توانای بەردەوامبوونی لە جەنگە لەسەرخۆکەی له‌گه‌ڵ ئۆكراین، کە خەریک بوو ئابووریی وڵاتەکەی دادەڕوخاند.
لە مانگەکانی ڕابردوودا، سزاکانی سەر کەرتی وزەی نێودەوڵەتی، دابەزینی نرخی نەوتی جیهانی و دیاریکردنی نرخ لەلایەن یەکێتیی ئەوروپا و بەریتانیاوە، قەیرانێکی دارایی سەختیان بۆ ڕوسیا دروستکردبوو، کە پێنج ساڵ لەمەوبەر نزیکەی 45%ـی بودجە فیدراڵییەکەی، پشتی بە داهاتی نەوت و گاز دەبەست، بەڵام دوای ئەوەی موشەکەکانی ئەمریکا و ئیسرائیل بۆ یەکەمجار ئێرانیان پێکا، لە شەو و ڕۆژێکدا دۆخەکە بە تەواوی بۆ ڕوسیا گۆڕدرا.
