حکومەتی ئێران لە نوێترین هەنگاوییدا، لە ڕێگەی بڵاوکردنەوەی زنجیرە فیلمێک بەناوی "ڕووناکی شەو"، شەڕێکی تایبەتی دژ بە کورد دەستپێکردووە و زەمینەسازی بۆ هێرشکردنە سەر ڕۆژهەڵاتی کوردستان دەکات.
ئەمە لە کاتێکدایە، حکومەتی ئێران شارەکانی ڕۆژهەڵاتی کوردستانی بە تەواوی بە سەربازگە کردووە و بە جێگیرکردنی چەکی قورس لە ناو شارەکاندا و ئامادەکاریی بۆ پێکدادانێکی قورسی سەربازیی دەکات.
هاوکات، سوپای پاسداران سنورەکانی نێوان ڕۆژهەڵات و باشوری کوردستانی بە تانک و تۆپ تەنیوە، هەڕەشەی ئەوەی لە خەڵکی سنورەکان کردووە، بە بێ هیچ ئاگادارکردنەوەیەکی پێشوەختە دەیانکاتە ئامانج.
لە لایەکی دیکەشەوە، لە ڕێگەی درۆن و موشەکەوە ناوەندەکانی هێزی پێشمەرگەی هەرێمی کوردستان، فڕۆکەخانەکان و ناوەندە دیپلۆماتییەکان وهەروەها کەمپی نیشتەجێبوونی پەنابەرانی ڕۆژهەڵات لە هەرێمی کوردستان، بە بەردەوامی دەکاتە ئامانج.
تاران لە ڕێگەی زنجیرە فیلمەکانییەوە، کار لەسەر شێواندنی وێنەی کورد دەکات و هەوڵ دەدات کورد وەک کارکتەرێکی "سیخوڕ و تیرۆریست" نمایش بکات کە گوایە لە خزمەت ئەجێنداکانی ئیسرائیلدایە و هەوڵی تێکدانی ئاسایشی ئێران دەدات.
بڵاوکردنەوەی ئەم جۆرە فیلمانە لە میدیای فەرمیی حکومەتی ئێران، زەنگێکی مەترسیدارە بۆ هێرشێکی بەرفراوانی ئێران بۆ سەر ڕۆژهەڵاتی کوردستان.