داواکاری گشتیی ئێران بڕیارێکی نوێی دەرکرد و تێیدا ڕێکخستنی بریکارنامە (وەکالەت) بۆ گواستنەوەی موڵک و ماڵی ئەو هاوڵاتیانەى لە دەرەوەی وڵات دەژین "تاوەکو کاتێکی نادیار" ڕاگرت و ئەم هەنگاوەش وەک فشارێک بۆ سەر نەیاران و بەشداربووانی خۆپێشاندانەکان دەبینرێت.
محەممەد کازم موەحیدی، داواکاری گشتیی ئێران ڕایگەیاند، فەرمانیان ئاڕاستەی وەزارەتی دەرەوە کردووە کە دەبێت سەرجەم ئەو بریکارنامانەی بۆ گواستنەوەی موڵک و ماڵ ڕێکدەخرێن، ڕەوانەی داواکاری گشتی بکرێن بۆ پێداچوونەوە و وردبینیکردن.
داواکاری گشتیی ئێران بە ڕاشکاوی هۆکاری بڕیارەکەی ڕوون کردەوە و گوتى: "ڕێگە نادەین کەسانێک لە دەرەوەی وڵات دژی کۆماری ئیسلامیی ئێران و بۆ بەرژەوەندی دوژمن کار بکەن، بەڵام لە ناوخۆی وڵاتدا خاوەنی بەرژەوەندی ماددی بن."
ئەم بڕیارە دوای ئەوە دێت کە لە ماوەی ڕابردوودا و هاوکات لەگەڵ ئاڵۆزییەکانی ناوچەکە و جەنگ، ژمارەیەکی زۆر لە هاوڵاتیانى تاراوگە بەشدارییان لە گردبوونەوە ناڕەزایەتییەکاندا کردووە.
پێشتریش لە هەڵوێستێکی هاوشێوەدا، دەزگای دادوەریی ئێران بە تۆمەتی "هاوکاری لەگەڵ دوژمن" لیستی ناوی چەندین ڕۆژنامەنووس، هونەرمەند و وەرزشکاری بڵاوکردەوە کە بڕیاری دەستبەسەرداگرتنی موڵک و ماڵەکانیانی دابوو.