گروپی کیژانی کوردستان یەکەمین کۆنسێرتی هونەریی خۆی لە سلێمانی ئەنجامدا

گروپی کیژانی کوردستان بە دروشمی "شەپۆلێک لە مۆسیقا و هونەری ڕەسەنی کوردی"، یەکەمین کۆنسێرتی خۆی لە شاری سلێمانی بەڕێوە برد.

کۆنسێرتەکە ئێوارەی دوێنێ لە تەلاری هونەری سلێمانی ساز کرا و لەلایەن ژمارەیەکی بەرچاو لە هونەردۆستان و ئارەزوومەندانی گۆرانیی کوردییەوە پێشوازییەکی گەرمی لێ کرا. لە میانی کۆنسێرتەکەدا، چەندین پارچە گۆرانی بە هەردوو شێوەزاری سۆرانی و کرمانجی، بە شێوازی تاکی (سۆلۆ) و کۆڕاڵ پێشکەش کران.

گروپی کیژانی کوردستان لە نیسانی 2026 دامەزراوە و لە هونەرمەندانی ژنی هەر چوار پارچەی کوردستان پێکهاتووە، کە ئامانجی سەرەکییان پەرەدان و زیندووڕاگرتنی میوزیک و فۆلکلۆری ڕەسەنی کوردییە. لەم کۆنسێرتەدا، ئەندامانی گروپەکە بە پۆشاکی ڕەسەنی کوردییەوە لەسەر شانۆ دەرکەوتن، کە پێکهاتبوون لە دەنگبێژان: زینوێ حوسێن، سێوە کامیل، ژیان وەلەدی و نۆژەن بورهان.

بە گوێرەی بەرنامەی ڕاگەیەندراوی گروپەکە، بڕیارە ڕۆژی شەممە 8ی ئابی 2026 دووەم کۆنسێرتی خۆیان بە شێوەیەکی بێبەرامبەر لە شاری هەڵەبجەی شەهید پێشکەش بە هونەردۆستان بکەن.