شەپۆلی فشار و دەستبەسەرکردنی هاوڵاتییان و چالاکوانانی کورد لەلایەن دەزگا ئەمنی و دادوەرییەکانی ئێرانەوە بەردەوامیی هەیە.
بەگوێرەی ڕاپۆرتی ڕێکخراوەکانی مافی مرۆڤ، لە نوێترین پێشهاتدا دەزگای دادی ئێران لە پارێزگای خۆراسانی باکوور، سزای 14مانگ زیندانیکردنی بەسەر ئاریا نوورانی، مامۆستا و هاوڵاتیی کوردی خەڵکی خۆراساندا سەپاندووە کە پێشتر و لە کاتی خۆپێشاندانەکانی مانگی بەفرانباری ڕابردوودا دەستبەسەر کرابوو؛
ئەمەش لە کاتێکدایە لەو نامە فەرمییەی ئاڕاستەی کراوە، هیچ ئاماژەیەک بە جۆری تۆمەتەکان یان بەڵگەکانی پشت ئەم بڕیارە نەکراوە.
هاوکات لەگەڵ ئەم سزایە و بەگوێرەی ڕاپۆرتەکانی ڕێکخراوی مافی مرۆڤی هەنگاو، هێزە ئەمنییەکان لە شارستانی مێهرانی سەر بە پارێزگای ئیلام، هاوڵاتی و چالاکوانێکی مەدەنیی کوردیان بە ناوی سەعید ئاسارە لە ماڵەکەی خۆیدا دەستبەسەر کردووە.
سەعید ئاسارە کە خەڵکی مەلەکشاهی و دانیشتووی شارۆچکەی ئیسلامییەی سەر بە مێهرانە، ڕۆژی سێشەممە، بەبێ نیشاندانی چ جۆرە بەڵگەیەکی یاسایی و دادوەری دەستبەسەر کراوە و بۆ شوێنێکی نادیار گواستراوەتەوە.
سەرڕای بەدواداچوونی بەردەوامی بنەماڵەکەی بۆ دامەزراوە ئەمنییەکان، تا ئێستا هیچ زانیارییەک لەسەر هۆکاری گرتنەکەی، تۆمەتە پاڵدراوەکان و شوێنی ڕاگرتنی نەدراوە و ناوبراو لە سەرەتاییترین مافەکانی وەک پەیوەندیی تەلەفۆنی، چاوپێککەوتن و دەستڕاگەیشتن بە پارێزەر بێبەش کراوە