جێگری سەرۆکوەزیرانی هەرێمی کوردستان پشتیوانیی خۆی بۆ هەنگاوەکانی حکومەتی نوێی عێراق لە دژایەتیکردنی گەندەڵیدا رادەگەیێنێت و لەگەڵ سەرۆککۆماری عێراقیش لەسەر پێویستیی زیادکردنی هەماهەنگیی نێوان هەولێر و بەغدا هاوڕان.
قوباد تاڵەبانی، جێگری سەرۆکوەزیرانی هەرێمی کوردستان بە سەردانێک لە بەغدایە و لەوێ لەگەڵ نزار ئامێدی، سەرۆککۆماری عێراق کۆبووەوە.
لە کۆبوونەوەکەدا چەندین پرسی گرنگی پەیوەست بە دۆخی سیاسی و ئابووریی عێراق و هەرێمی کوردستان تاوتوێکران.
بەگویرەی راگەیێندراوێکی قوباد تاڵەبانی، لە کۆبوونەوەکەدا لەگەڵ سەرۆککۆماری عێراق هاوڕابوون لەسەر پێویستیی کارکردنی زیاتر بۆ پاراستنی سەروەری و سەربەخۆیی سیاسیی عێراق.
هاوکات پشتیوانیی خۆیان بۆ هەنگاوەکانی حکومەتی نوێی عێراق لە پێناو بەرەنگاربوونەوەی گەندەڵیدا دووپاتکردەوە.
هەر لە دیدارەکەدا، جەخت لەسەر پێویستیی زیادکردنی ئاستی هەماهەنگی و دیالۆگی نێوان هەردوو حکومەتی فیدراڵ و حکومەتی هەرێمی کوردستان کرایەوە؛
بەمەبەستی دۆزینەوەی چارەسەری ریشەیی بۆ کێشە هەڵپەسێردراوەکان و کارکردنی هاوبەش لەپێناو گەشەپێدانی کەرتی ئابووری لە عێراق و هەرێمی کوردستاندا.