ئەبزەر خەلیل، ئەندامی دەستەی سەرکردایەتیی پارتی یەکێتیی دیموکرات (PYD)، سەرکۆنەی هێرش و هەڵکوتانە سەرەکانی ئەم دواییەی هێزە ئەمنییەکانی سەر بە حکومەتی دیمەشقی بۆ سەر دوو شارۆچکەی کوردی لە باشووری ڕۆژهەڵاتی پارێزگای حەلەب کرد و داوای "کۆتاییهێنانی دەستبەجێ" لەم پێشێلکارییانە دەکات.
خەلیل لە پۆستێکدا لە تۆڕی کۆمەڵایەتیی (ئێکس) ڕایگەیاند: "ئێمە داوای کۆتاییهێنانی دەستبەجێ بە سەرجەم پێشێلکارییەکان، ئازادکردنی دەستبەجێی دەستبەسەرکراوان و لێکۆڵینەوەیەکی سەربەخۆ و شەفاف دەکەین بۆ لێپرسینەوە لە هەموو ئەو کەسانەی لەم پێشێلکارییانەدا بەرپرسیارن."
داواش دەکات کە پێویستە گەرەنتی پاراستنی هاوڵاتیانی مەدەنی و مافی مانەوەیان لەسەر خاکەکەیان بە شکۆمەندی و سەلامەتییەوە بدرێت.
ئەم کاردانەوەیەی سەرکردەکەی PYD دوای ئەوە دێت کە ڕۆژی سێشەممە، هێزە ئەمنییەکانی سەر بە دیمەشق بە دەیان چەکدار و ئۆتۆمبێلی سەربازیی قورسەوە، هەڵیانکوتایە سەر هەردوو شارۆچکەی کوردیی "تل عەران" و "تل حاسڵ" لە باشووری ڕۆژهەڵاتی حەلەب و دەستیان بە گرتنی هاوڵاتیان کرد.
بەگوێرەی سەرچاوە خۆجێیەکان لە کاتی هەڵکوتانە سەرەکەدا چەندین هاوڵاتیی کورد دەستبەسەر کراون و چەند ژنێکیش لەلایەن هێزە ئەمنییەکانەوە ڕووبەڕووی هێرش و لێدان بوونەتەوە، کاتێک هەوڵیانداوە بە مۆبایلەکانیان دۆخەکە بەدۆکیۆمێنت بکەن یان داوای بینینی بڕیاری دادگایان کردووە بۆ گرتنی کەسەکان.
ئەبزەر خەلیل لە درێژەی قسەکانیدا ئاماژەی بەوە کرد: "ئەوەی لە تل عەران و تل حاسڵ ڕوودەدات، تەنها ڕووداوێک نییە، بەڵکو هێرشێکی مەترسیدارە بۆ سەر هاوڵاتیانی مەدەنی و هەوڵێکە بۆ سەپاندنی واقیعێکی نوێ بە زەبری هێز."
جەختیشی کردەوە کە گرتنی سەرەڕۆیانە و هێرشکردنە سەر ژنان و گەنجان، بە دایکی بەتەمەنیشەوە، هەڕەشە لە ئاشتیی کۆمەڵایەتی دەکات و بنەماکانی دادپەروەری و شەریکایەتیی نیشتمانی تێکدەدات.
یەکێک لەو ژنانەی کە بووەتە قوربانیی هێرشی هێزە ئەمنییەکان، هاوڵاتییەکی کوردە بە ناوی "نەزها حەمکی"، کە دوای ئەوەی گرتەی ڤیدیۆیی لەسەر هێرشی هێزەکان تۆمار کردووە و داوای وەرەقەی دەستبەسەرکردنی کردووە، بە توندی لێی دراوە.
لەو ڤیدیۆیانەی لە تۆڕە کۆمەڵایەتییەکاندا بڵاوبوونەتەوە، شوێنەواری شینبوونەوە و لێدان بە جەستەی نەزهاوە دیارە و بەهۆی سەختیی برینەکانیەوە گوازراوەتەوە بۆ نەخۆشخانە.
ئەم ڕووداوانە لە کاتێکدا دێن کە لەم دواییانەدا نیگەرانییەکانی شەقامی کوردی لە ناوچەکانی ژێر دەسەڵاتی دیمەشق زیادیان کردووە، بەتایبەت بەهۆی کەمبوونەوەی نوێنەرایەتیی ژنانی کورد و قەدەغەکردنی بەرزکردنەوەی ئاڵای پارتە کوردییەکان لە کۆبوونەوە فەرمییەکاندا.