دوو بەرپرسی باڵای کۆمەڵەی زەحمەتکێشان و کۆمەڵەی شۆڕشگێڕی کوردستانی ئێران ڕایانگەیاند کە بەرەبەیانی ئەمڕۆ بە چوار درۆن هێرش کراوەتە سەر کەمپەکانیان لە ناوچەی زڕگوێز و کەمپی سوورداش لە سنووری پارێزگای سلێمانی.
بە گوێرەی لێدوانی بەرپرسانی ئەو دوو حزبە، لە زڕگوێز خانووی ئەندامێکی مەکتەبی سیاسیی کۆمەڵەی زەحمەتکێشان کراوەتە ئامانج و لە سوورداشیش هێرش کراوەتە سەر بارەگاکانی کۆمەڵەی شۆڕشگێڕ.
ئەمجەد حوسێن پەناهی، ئەندامی سەرکردایەتیی کۆمەڵەی زەحمەتکێشان، و ئارام مودەریسی، ئەندامی کۆمیتەی ناوەندیی کۆمەڵەی شۆڕشگێڕ، ڕایانگەیاند کە هێرشەکان نزیک کاتژمێر چواری بەرەبەیان ڕوویانداوە و زیانی مادیی بەرچاو و وێرانکارییان لێکەوتووە، بەڵام خۆشبەختانە هیچ زیانێکی گیانییان نەبووە.