نرخی تەماتە لە هەرێمی کوردستان بە بەرزیی ماوەتەوە و سەرۆکی ئەنجومەنی عەلوەی هەولێریش دەڵێت: چەند ڕۆژێکی دیکە نرخەکەی دادەبەزێت.
ڕەجەب حاجی عەزیز سەرۆکی ئەنجومەنی عەلوەی هەولێر لە کۆنگرەیەکى ڕۆژنامەنوسى ڕایگەیاند: بەرزبوونەوەی ئێستای نرخی تەماتە لە بازاڕەکانی هەرێمی کوردستان کاتییە و لە نزیکترین کاتدا نرخەکەی دادەبەزێت، چونکە هۆکارەکانی گرانبوونی کۆتاییهاتنی بەرهەمی زستانە و دواکەوتنی بەرهەمی هاوینەیە کە ناوخۆیین.
ئاماژەی بەوەشکرد: بەهۆی ئەوەی بەرهەمی زستانە نەماوە و سارد و سەرماش درێژەی هەبوو، پێگەیشتنی تەماتەی بەسرە و خواروی عێراق دواکەوت، بەڵام لە چەند ڕۆژی داهاتوودا دێنە بەرهەم و دەکەونە بازاڕەوە، بەوەش نرخی تەماتە دادەبەزێت.
ئەوەش لە کاتێکدایە، لە ئێستادا نرخی تەماتە بەشێوەیەکی بەرچاو بەرزبووەتەوە و لە عەلوەکان هەر کیلۆیەکی بە هەزار و 500 دینار و لە هەندێک شوێنێش کیلۆیەک تەماتە بە دوو هەزار و 500 دینار دەگاتە دەستی هاوڵاتیی.