بەهۆی وەرگەڕانی بارهەڵگرێک لە نزیک سەنتەری ڕۆشنبیری شاری کەرکوک، ژمارەیەک هاوڵاتی بوونە قوربانی و زیانێکی زۆر لە شوێنی ڕووداوەکە کەوتەوە.
پەیامنێری "نوچە تیڤی" لە شاری کەرکوک ڕایگەیاند، بارهەڵگرێک لە شەقامی دەروازە لە نزیک سەنتەری ڕۆشنبیریی شاری کەرکوک کۆنتڕۆڵی خۆی لەدەستداوە و وەرگەڕاوە.
بە گوێرەی زانیارییە سەرەتاییەکان، بەهۆی ئەم ڕووداوەکەوە تاوەکو ئێستا پێنج هاووڵاتی گیانیان لەدەستداوە و 14 کەسی دیکەش بریندار بوون.
ڕووداوەکە زیانێکی زۆری ماددی بە چەندین ئۆتۆمبێلی هاووڵاتیان گەیاندووە کە لەو کاتەدا لە شەقامەکەدا بوون و بەشێکیان بەهۆی ئاگرەکەوە سووتاون.
تیمەکانی بەرگریی شارستانی و فریاگوزاری گەیشتوونەتە شوێنی ڕووداوەکە و توانیویانە ئاگرەکە کۆنتڕۆڵ بکەن و بریندارەکان بۆ نەخۆشخانە بگوازنەوە.