لە چوارچێوەی جێبەجێکردنی بڕگەکانی ڕێککەوتنی نێوان هێزەکانی سوریای دیموکرات (هەسەدە) و حکومەتی کاتیی سوریا، شاندێکی باڵای وەزارەتی دادی حکومەتی کاتیی گەیشتنە شاری حەسەکە و لەلایەن نوورەدین ئەحمەد پارێزگاری حەسەکەوە پێشوازییان لێکرا.
شاندەکەی حکومەتی کاتیی لە حەسەن توربە، جێگری گشتیی سەرۆکایەتی کۆمار و محەمەد ناسر، ئەندامی وەزارەتی داد و ئەحمەد هیلالی، نوێنەری سەرۆک وەزیران پێکهاتبوون کە لەگەڵ پاریزگار و بەرپرسانی ئیدارەی حەسەکە، زنجیرەیەک کۆبوونەوەیان لە ناو باڵەخانەی پارێزگا ئەنجامدا.
کۆبوونەوەکان بە مەبەستی هەماهەنگی بۆ یەکخستنی دامەزراوە دادوەرییەکان و بەڕێوەبردنی کاروباری یاسایی لە پارێزگاکەدا بەڕێوە چوو.
شاندەکە دوای کۆبوونەوەیان لەگەڵ پارێزگار، سەردانی باڵەخانەی دادوەریی کۆمەڵایەتییان کرد و لە نزیکەوە لەگەڵ پارێزەران و کارمەندانی یاسایی کۆبوونەوە، پاشان ڕوویان لە زیندانی غوێران کرد لە شاری حەسەکە.
حەسەن توربە لە کۆنگرەیەکی ڕۆژنامەوانیدا لەبەردەم زیندانەکە ڕایگەیاند، بە فەرمیی سەرپەرشتی زیندانی غوێرانیان وەرگرتووە و بڕیاریان داوە نووسینگەیەکی یاسایی تایبەت بە داواکاری گشتیی لە ناو زیندانەکەدا بکەنەوە.
نووسینگەکە ڕاستەوخۆ بە وەزارەتی داد بەستراوەتەوە و ئەرکی سەرەکیی چاودێریکردنی وردی دۆخی زیندانییەکان و ڕێڕەوی یاسایی کەیسەکانیان دەبێت.