سوپای پاسدارانی ئێران لە راگەیێندراوێکی نوێ و فەرمیدا، هۆشدارییەکی کتوپڕ و تووند ئاراستەی هێزە نەیارەکانی دەکات و رایدەگەیێنێت، هەر جۆرە سەرکێشییەکی سەربازیی نوێ بۆ سەر خاکەکەیان، باجەکەی تەنیا لەسەر ئاستی ناوچەکە نابێت.
له راگەیێندراوەکەی سوپای پاسداران دا هاتووە: "ئەگەر دەستدرێژی بۆ سەر ئێران دووبارە ببێتەوە، ئەوا بازنەی جەنگەکە بۆ دەرەوەی ناوچەی رۆژهەڵاتی ناوەڕاست فراوان دەکرێت و دەگوازرێتەوە بۆ ئەو شوێنانەی کە دوژمنان چاوەڕوانی ناکەن."
هاوکات لەگەڵ ئەم هۆشدارییە سەربازییە، محەممەد باقر قاڵیباف، سەرۆکی دانوستاندنکارانی ئێران رایگەیاند، وڵاتەکەی لە حاڵەتی ئامادەباشیدایە و خەریکی داڕشتنی پلانە بۆ دابینکردنی "وەڵامێکی زۆر بەهێز و تووند" بەرامبەر هەر هێرشێکی ئەگەری کە بکرێتە سەر خاکەکەیان.
قاڵیباف لە بەشێکی دیکەی قسەکانیدا هێرشی کردە سەر سیاسەتەکانی واشنتن و ئاماژەی بەوە کرد، ئەمریکا هیوای وایە کە کۆماری ئیسلامیی ئێران خۆی بەدەستەوە بدات، بەڵام تاران هیچ سازشێک لەسەر مافەکانی ناکات و لەسەر هەڵوێستە سەربازی و سیاسییەکانی سوورە.
ئەم پەیامە هەڕەشەئامێزە نوێیانەی تاران لە کاتێکدان، کە گرژی و ئاڵۆزییە سەربازی و دیپلۆماسییەکانی رۆژهەڵاتی ناوەڕاست گەیشتوونەتە ئاستێکی بەرز.
چاودێرانی سیاسی پێیان وایە کە ئەم گوتارە هاوبەشەی سوپای پاسداران و سەرۆکی دانوستاندنکارانی ئێران، پەیامێکی روونە بۆ ئەمریکا و هاوپەیمانەکانی لە ناوچەکەدا، کە هەر هێرشێکی دیکە بۆ سەر ژێرخانی سەربازی یان ئەتۆمیی ئێران، دەکرێت تەواوی هاوکێشە ئەمنییەکانی جیهان بشێوێنێت و شەڕەکە لە چوارچێوەی ناوچەییەوە بگۆڕێت بۆ رووبەڕووبوونەوەیەکی نێودەوڵەتیی بەربڵاو.