گوتەبێژی سەرۆکایەتیی هەرێمی کوردستان ڕایگەیاند کە لە ئێستادا پەیوەندییەکانی نێوان هەرێمی کوردستان و حکومەتی فیدراڵی لە هەموو کات زیاتر بەهێزە، و یەکێک لە تەوەرە سەرەکییەکان پەرەپێدانی ئەو پەیوەندییانە بووە.
لە لێدوانێکدا بۆ دەنگی ئەمریکا، دڵشاد شەهاب ئاماژەی بەوە دا کە عێراق لەبەردەم کۆمەڵێک کێشە و ئاڵۆزیی قوڵدایە و ئەگەر چارەسەریان بۆ نەدۆزرێتەوە، عێراق بەرەو ئایندەیەکی نادیار دەڕوات کە کاریگەریی ڕاستەوخۆی لەسەر هەرێمی کوردستانیش دەبێت.
سێ ئامانجی سەرەکیی بەشداریی سەرۆکی هەرێم لە کۆبوونەوەکەی هاوپەیمانیی ئیدارەی دەوڵەتدا:
ڕۆژی پێنجی ئەم مانگە، هاوپەیمانیی ئیدارەی دەوڵەت بە بەشداریی چوار سەرۆکایەتییەکەی عێراق و سەرۆکی هەرێم و لایەنە بەشدارەکانی حکومەت، کۆبوونەوەیەکی نااسایی و بەپەلەی ئەنجام دا، کە بەشداریی تێیدا لەسەر سێ پرسی سەرەکی چڕ بووبۆوە:
پرسی دارایی:
عێراق لە دوای جەنگەوە بە قەیرانێکی قوڵی دارایی و کورتهێناندا تێدەپەڕێت و خەرجیی چەند هێندەی داهاتە، ئەمەش کاریگەریی نەرێنی لەسەر دۆخی دارایی هەرێمیش هەبووە.
پرسی ئەمنی:
دراوسێکانی عێراق نیگەرانیی زۆریان بەرامبەر بەو گروپە چەکدارانە هەیە کە ئامادە نیین فەرمانی دەوڵەت جێبەجێ بکەن و بوونەتە هەڕەشە بۆ ناوخۆ و دەرەوەش.
دۆخی سیاسی و ئایندەی عێراق:
تاوتوێکردنی ئەو ئاڵنگارییانەی کە ئەگەر چارەسەر نەکرێن، عێراق بەرەو داهاتوویەکی ئاڵۆز دەبەن.