جوڵه‌ی چەکدارانی حەشدی شەعبی و زەینەبیوون كه سەر بە ڕژێمی ئێرانه له شاره‌كانی ئێران زیادیانكردووه و له هه‌موو سنوره‌كانی ئه‌و وڵاته‌ش بڵاوه‌یان پێكراوه.
بە گوێرەی ڕاپۆرتێکی ماڵپەڕی "دەنگی دەستگیرکراوانی کورد و ئێرانی"، جوڵە و چالاکیی چەکدارانی سەر بە ڕژێمی ئێران کە بە زەینەبیون دەناسرێن، هەروەها چەکدارانی حەشدی شەعبی لەسەر شەقامەکانی ئێران بە شێوەیەکی بەرچاو زیادیانکردووە، حه‌شدی بە هەڵکردنی ئاڵای عێراق و ئێران، لە بەسرەوە چوونەتە شارەکانی خوڕەمشار و ئابادان لە پارێزگای خوزستانی ئێران.
ڕاپۆرته‌كه باس له‌وه‌ده‌كات، ئەم میلیشیایانە لە شاری چابەهار لە پارێزگای سیستان و بەلوچستانیش جێگیرکراون و پشکنین بۆ ئۆتۆمبێلەکانیان ئەنجام دەدەن، هه‌روه‌ها چەکدارەکان بێڕێزی بە هاوڵاتییان دەکەن.
جێی وەبیرهێنانەوەیە، ئەم میلیشیایانە پێشینەیەکی خوێناوییان هەیە و لە کاتی خۆپێشاندانەکاندا لە دژی هاوڵاتیانی مەدەنی بەتایبەت کوردەکان بەکارهێنراون، لە زانکۆکانی ئێرانیش بۆ چاودێریکردنی خوێندکاران و سەپاندنی حیجابی زۆرەملێ جێگیر کرابوون.
